Б.Намуун: Миний аав ард олноосоо хамааралтай болохоос албан тушаалтны гарын аясаар хөдлөх нэгэн биш
    2017 оны 06 сарын 11 нд
    cd06b114a00af0fcd628c5871a0ed7b3.jpg

    Ерөнхийлөгчийн сонгуульд АН-аас нэр дэвшиж буй Х.Баттулгын Улаанбаатар хотын иргэд, сонгогчидтой уулзах уулзалт өнөөдөр боллоо. Энэ уулзалтын эхэнд нэр дэвшигч Х.Баттулгын охин Б.Намуун иргэд, сонгогчдод хандан үг хэллээ.

    Тэрбээр “Сайн байцгаана уу, намайг Баттулгын Намуун гэдэг. Би ардчилсан хувьсгалтай чацуу, шинэ чөлөөт нийгэмд төрж, өссөн анхны үеийн төлөөлөл юм. Монголынхоо төлөө аавыг минь дэмжиж буй та бүхэндээ талархаж байгаагаа гэр бүлийнхээ гишүүдийн өмнөөс болон хувиасаа илэрхийлье. Үеийнхнийхээ нэгэн адил алдаа оноо, сорилт бэрхшээлийг туулж яваа жирийн монгол аавын охин надад энэ индэр дээрээс үг хэлэх боломж олгосон нь миний хувьд өмнө нь хүлээж байгаагүй их хариуцлага болж байна.

    Аав минь Ерөнхийлөгчид нэр дэвшинэ гэдэг бахархалтай хэдий ч үүнийг дагаад маш их үүрэг хариуцлага, асуудал, бэрхшээлүүд гарч ирдэг юм байна. Тийм болохоор би аавдаа чадах бүхнээрээ туслах ёстой. Зөвхөн аавдаа төдийгүй нийгэмдээ тусалж буй хэрэг хэмээн бодож, гүтгэлэг дайралт бүрийг үл тоон чармайж явна. Сонгуулийн сурталчилгаа эхэлсэн өдрөөс нэр дэвшигчийнхээ, Монголынхоо төлөө нойр, хоолоо умартан, бүхий л чадлаараа зүтгэж буй АН-ын мянга мянган дэмжигчид, сонгуулийн штабын хамт олны нөр их хөдөлмөрт баярлалаа.

    Миний аав гэр хороолын жирийн айлд өсч, шилжилтийн бэрх цагт хөдөлмөр, зүтгэл, хатуужлаараа ялгаран гарч ирсэн. Тэр дундаа үндэсний үйлдвэрлэлийн үндсийг таслалгүй, тэнд ажиллаж байгаа мянга мянган ажилчдын ажлын байрыг өдий хүртэл хадгалж яваа, баялаг бүтээгч гэдгийг түмэн олон мэднэ.

    Аав минь Монголынхоо нэрийг олон улсад өндөрт өргөж, дуурсгахын төлөө бүхнээ зориулж, олимп, дэлхийн аваргуудыг төрүүлсэн ажил хэрэгч нийгмийн зүтгэлтэн гэдгийг хүн бүхэн мэддэг.

    Аав минь улс орны эдийн засгийн тусгаар тогтнолыг үйлдвэржилтээр баталгаажуулна хэмээн зорьж, төлөвлөж, хэрэгжүүлэхийн төлөө сайн муугаараа дуудуулж, гадны гар хөл бологсдод гүтгүүлж яваа. Гэв тэр зорьсноосоо ухраагүй, чин шударга төрийн зүтгэлтэн гэдгийг Монголын нийт сонгогчид бид мэднэ.

    Аав минь Монголын өв соёлыг хайрлан хамгаалж, бахархлыг бүтээхийг амаараа биш ажлаараа нотлон харуулсан, улс үндэстнээ эрхэмлэн дээдлэгч гэдгийг дотоод, гадаадын аялагчид, жуулчид сайн мэддэг. Аав минь асар их ачаалал, дарамтыг эрүүл чийрэг бие элгэн саднаа гэх эрмэлзлээрээ даван гарч байгааг хажуугаас нь би харж байгаа. Эрүүл чанга биеэс эх орны төлөө чин сэтгэл, тэсвэр тэвчээр ялгаран гардгийг харж байна.

    Даргын бус жирийн ардын гэрт төрж өссөн, амьдралын замаа ааваараа засуулах биш өөрөө босгож ирсэн миний аав бүх монголчуудын санаа бодлыг эрх тэгшээр төрийн бодлогод тусгаж чадна. Ганзаганд явж, арилжаа наймаа хийж, анхны хуримтлалаа босгосон нь үнэн учраас эгэл олны талд тэр бат зогсч чадна аа. Миний аав ард олноосоо хамааралтай болохоос албан тушаалтан, эрх мэдэлтнүүдийн гарын аясаар хөдлөх нэгэн биш. Түүнд бүрэн итгэж болно. Итгэл дааж, зүтгэл гарган тэмцдэг гэдгээ хангалттай нотлон харуулж чадсан гэдэгт би итгэдэг.

    Би энд нэг зүйлийг уриалмаар байна. Аливаа мэдээлэлд голч ухаанаар хандаж, хэн нь монголчууддаа элэгтэй, бодит ажил хийж ирснийг ялгаж салгана гэдэгт би итгэж байна. Та бүхэн аавыг минь дэмжээрэй. Монгол ялна аа” хэмээн хэллээ.